Suomelas-ugrilazet paistih omis pluanois
Tuhukuun alus piettih Ven’an rahvahantaijon koin filiualan Ven’an suomelas-ugrilazen kul’tuurukeskuksen koordinuattoroin nevvoston ozanottajien vastavus.
Vastavukseh yhtyttih Komin, Mari Elan, Mordouvien, Udmurtien tazavaldoin, Leningruadan alovehen, Permin alovehen Komi-Permin okrugan, Jugran Hanti-Mansiiskan avtonoumizen alovehen, Nenetskoin da Jamalo-Nenetskoin avtonoumizien alovehien kul’tuurualan da kanzallizen poliitiekan ozanottajat. Karjalan tazavallan puoles vastavukseh yhtyi Rahvahan taijon da kul’tuurualguhpanoloin keskuksen varajohtai Tatjana Ledn’ova.
Pivon piätarkoituksennu oli paista seminuaran järjestämizes, kuduas vois šeikuija kul’tuurualan projektoi.
— Suurdu neruo projektoin kirjuttamizes da todevuttamizes on Karjalan tazavallal da Hanti-Mansiiskan avtonoumizel alovehel. Seminuaran aijas da paikas piätetäh erikseh, sanottih nevvoston ozanottajat.
Pivos paistih sih nähtegi, kui voibi andua tiedokannatustu karjalazele Torvi-Camp -projektale, kudaman hantuzis järjestetäh etnoluageri nuorien muzikantoih da puhundusoittimil soittajih niškoi. Sežo paistih, kui voi popul’ariziiruja Nenetskoin avtonoumizen okrugan Etnokul’tuurukeskuksen etnogruafizii fil’moi.
Lähiaigua Ven’an suomelas-ugrilazen kul’tuurukeskus työndäy koordinuattoroile pluanan tärgevimis etnokul’tuurutoimindois.
