23. šyyškuuta tuli kulunuokši kakši vuotta takaperin Periodika-kuštantamon Oma Media -verkkoportalin avuamisešta. Vuuvvešta 2020 täh päiväh šuaten šielä on julkaistu noin 4500 uutisjuttuo ta yli 550 artikkelie. Portalista löytyy uutisie ta artikkelija šuomekši, karjalakši ta vepšäkši. Tänä vuotena portalilla julkaissah venäjänkielisie uutisieki.
— Venäjän kielen osion avuamini on yksi tämän vuuvven tärkeimmistä šuavutukšista. Šen avulla voimma kertuo tašavallan uutisie, kumpaset liitytäh karjalaisien, šuomelaisien ta vepšäläisien elämäh šamoinki venäjänkielisellä lukijalla, Periodika-kuštantamon johtaja Natalja Sinitskaja šanou.
Šentäh jotta eryähie uutisie on julkaistu millänih kanšalliskielellä ta niise venäjäkši niitä voipi käyttyä kielen opaštumisešša.
— Esittelimmä muutoman kerran tämmösen mahollisuon opaštajilla, portalin piätoimittaja Mikko Nesvitski kertou.
Lähišuunnitelmissa on avata portalin uušie ošie.
— Tahomma avata Oma Radio -ošan, kumpasešša käyttäjät šuahah kuunnella iäniohjelmie. Nyt valmissamma mukavie teemoja tätä ošua varoin, Natalja Sinitskaja lisyäy.
Aihiešta voit lukie niise šuomekši ta vepšäkši.