Kulttuurin ta kielien šäilyttämiskyšymykšie noššettih piämiehen eteh
Karjalan piämiehen rinnalla toimijan karjalaisien, vepšäläisien ta šuomelaisien etuštajien neuvošton issunnon piäteemoina tällä kertua oltih kulttuuriperinnön ta kantakanšojen kielen šäilyttämisen ta digitalisoinnin kyšymyš ta Venäjän kanšojen kulttuuriperinnön vuuvven tulokšet Karjalan tašavallašša.
Issunnošša esiinnyttih Karjalan tietokeškukšen kielen, kirjallisuon ta istorijan instituutin istorijan ošašton johtaja Svetlana Jalovitsina, Etnokulttuurialottehien kannatuš- ta kehityšfondin spesialisti Anna Kalaberda ta Karjalan kulttuuriministeri Aleksei Lesonen.
Kielen, kirjallisuon ta istorijan instituutin iänityšarhiivašša on yli 5000 tuntie nauhotukšie. Ne pitäy digitalisoja, ka instituutissa ei riitä tekniillisie mahollisukšie eikä ole riittäväšti kielen kannattajie. Karjalan piämieš vihjasi, jotta pakinat kieli- ta kultturiperinnön digitalisoinnista ta šäilyttämiseštä pietäh federalisella tašolla.
— Pitäy ymmärtyä, jotta Hallitukšen ruavon tärkie šuunta on Karjalan kantakanšojen kulttuuri-, kieli- ta henkillisperinnön šäilyttämini. Še on vaihtumaton tašavallan kehittämisen oša, šano Artur Parfenčikov.
Etnokulttuurialottehien kannatuš- ta kehityšfondin spesialisti Anna Kalaberda esitti TAJU-portalin valmistamisen ta pitämisen tulokšie. Šiinä on esillä materialija kahešša ošaštošša: Karjalan kulttuuriperintö ta Kanšankulttuurin perintehet nykyseššä taijošša.
Karjalan kulttuuriministeri Aleksei Lesonen kerto mimmosie tapahtumie oli pietty Venäjän kanšojen kulttuuriperinnön vuuvven aikana Karjalan tašavallašša.
Issunnon lopušša oli noššettu kyšymyš tašavallan lajista kulttuuriperinnöštä. Karjalan piämieš miäräsi tutkie as’s’a ta još tarveh on ta lakih voipi lisätä šemmosie pykälie, kumpasie ei ole federalisešša lajissa alottua lajin valmissuš.
Aihiešta voit lukie niise vepšäkši.
