Kuin šilma kučutah?: Uuši KV-SHOW on omissettu nimilöillä
Tänäpiänä OMA MEDIA-portalissa julkaissah KV-SHOW-videoprojektin uuši šarja. Tällä kertua šen teemana on karjalaiset nimet.
KV-SHOW-videoprojektin uuši šarja on karjalan ta venäjän kielellä. Mitein kučuttih lapšie ta aikuhisie? Ketä vois kuččuo Napiksi, Tähekši tahi Pyhöikši? Lähetykšen vetäjät Ondrei Gorškov ta Santra Aniskina vaššatah niih kyšymykših ta kerrotah karjalankielisista nimilöistä.
— Santran kera myö kertoma aikuhisien ta lapšien nimilöistä, šuvi- ta pohjoiskarjalaisista šukunimilöistä, šekä kiššojen, koirien ta lehmien nimilöistä. Tämä teema on mukava, miulta rikeneh kyšytäh, kuin tämä nimi on karjalakši tahi mi nimi antua kiššalla. Myö šaima tietoja Olga Karlovan, Denis Kuz’minin ta Olga Žarinovan tietojulkaisuista, näin šynty tämä uuši lähetyš, kerto KV-SHOW-videoprojektin vetäjä, Karjalan kanšallisen teatterin näyttelijä Andrei Gorškov.
Ohjelman vetäjät yhen šarjan aikana ei keritty kertuo kaikista nimilöistä, vain šuosituimmista, ka videon liittehenä on nimien luvettelo, šamoin Ondrei ta Santra kučutah kirjuttua omie kyšymykšie ta ajatukšie teemašta videon kommenttiloih.
KV-SHOW on ohjelma Karjalašta ta tašavallan kantakanšoista, šiinä käytetäh karjalan ta vepšän kieltä. Videoprojektie toteuvutah Karjalaisien, vepšäläisien ta šuomelaisien kieliresurssikeškukšen kannatukšella.
