Šajekuun 3. päivänä Kalevalan piirissä piettih Karjalan vapauttumisella omissettuja muistopitoja.
– Vuuvven 1944 šyyškuušša Karjala oli vapautettu fašistien vallottajista. Juuri Kalevalan piirin rajapartisanijoukko otti ičellä enšimmäisen hyökkäykšen. Täššä paikašša vihollisella ei annettu piäššä ielläh. Myö oikein kunnivoičemma heijän urošruatoja ta muissama heitä, šanottih muistotilaisuon järještäjät.
Enšin Kalevalašša pantih kukkie ta piettih hil’l’aisušhetki vellešhauvalla, šen jälkeh tapahtumat šiirryttih Kiiskieseh, missä oli rekonstruoitu Šuuren Isänmuallisen šovan tapahtumie. Räjähykšet, ampumini, miehet tovellisissa pukuloissa ta šen ajan ašiet autettih kaččojie tuntie, mitä šota on. Kaikki oli niin kuin tovellah.
Rekonstruointih otti ošua yli 80 ihmistä. Hyö ollah Piiterin, Murmanskin ta Petroskoin istorijallisien šeurojen jäšenie. Tilaisuš piettih Pieni ihmini šuurešša šovašša -projektin rajoissa.