Läksi eloho uz’ vepsänkeline ”Kipinä”-kulehtesen nomer. Mö ezitam teile uden video-žurnalan vepsän kelel lapsiden täht. ”Kuki-rikku” läksi eloho Petroskoi-lidnas ”Periodika”-paindištos. Sen tegijad starinoičeba žurnalad, kut sündui žurnal, miččed lapsed ühtniba sjomkoihe.
Melentartuižen sarnan meile oigenzi Varelia Sotnikova Ptroskoiš. Se on jo ”Kipinän” lehtpolil. Miččed kalud pidab otta kerdale heinäntegole i mitte on tärktemb niišpäi, tedištam sarnas.
”Tedad-ik tö?”-rubrikas on keratud gavedid Karjalan mecaspäi. Täl kerdal žurnalan lugijad tedištaba melentartuižid tedoid gavedin polhe: mezjaižiš, bumbakois, lipikaižiš da toižiš.
”Kipinä” starinoičeb lapsile vepsläižen naižen polhe, kudamb tegi äi hüväd Suren voinan aigan. Anna Lisicina on partizan Vepsän malpäi. Midä hän tegi i mikš mö muštam händast nügüdehesai, lugegat udes nomeras.
― Mugažo ”Teiden ičetoi lehtpolil”-rubrikas om paindud lapsiden starinad ičeze melentartusen polhe, miččed hö oigebziba meiden konkursaha. ”Kipinä”-kulehteses jatktase ”Ole hüvä, ole terveh!”- konkurs. Mö kucum tahtnikoid ühtnemaha konkursaha sebranikanke, kanzanke vai ühtenklassnikoidenke, sanub ”Kipinä”-žurnalan toimitai Darja Švecova.
Tradicijan mödhe žurnalas om äi melentartuižid tegendoid, kebnoid kodvusid da vändoid. Täl kerdal nece om popul’arine Memo-vänd. Sen abul voib kehitoitta vepsän kelen mahtoid da panda muštho uzid sanoid.