Karjalan piämieš ehotti maskitilan lakkautumista tašavallašša
Karjalan halličuš valmisti Artur Parfenčikovin allakirjuttaman kirjasen Venäjän Rospotrebnadzor-viraštoh. Alovehen viranomaset ehotetah lakata piätervehyšliäkärin Anna Popovan piätökšen maskien pakollisešta käytöštä avonaisissa paikoissa, rahvahallisissa kulkuvälinehissä, taksiloissa, pakotukšissa, hiššilöissä.
– Šamah aikah mieleštäni on pakko šäilyttyä maskitilua tervehyšhoitolaitokšissa, missä tartunnan riski on korkie, korošti Artur Parfenčikov omalla VK-šivulla.
Ehotuš liittyy tautisuon vähenömiseh Karjalašša. Tuiskukuušša oli rekisteröity 196,8 tapahušta 100 000 eläjaštä, a šulakuušša – 5,8 tapahušta.
Karjalašša maskitila šuatettih voimah vuuvven 2020 šajekuun 16. päivän piätervehyšliäkärin piätökšen mukah. Nykyjäh alovehella on otettu pois kaikki koronarajotukšet paičči maskien pakollista käyttämistä avonaisissa paikoissa, rahvahallisissa kulkuvälinehissä, taksiloissa, pakotukšissa, hiššilöissä.
