Vuokkiniemen Kylätalo ta Sreda-keškuš kučutah kaikkie juhlimah Il’l’anpäivyä ta kylän päivyä. Tänäpiänä juhlah keräytyy kyläläisie ta vierahie toisista kylistä ta kaupunkiloista.
– Tämän vuuvven juhlan erikoisuš on šiinä, jotta šuamma innoššušta Vuokkiniemen luonnošta taiteilijan opaššukšella. Karjalan talo -työpajašša on mahollista rakentua pieni karjalaini talo. Mie tykkyän karjalan kieltä -kentällä tutuššumma karjalan kieleh ta harjottelemma šitä. Vuokkiniemen aapini -kirjan kirjuttaja Tatjana Tupina esittäy omua kirjua, Kylätalon omistajan Sreda-kulttuurikehityškeškukšen johtaja Jelena Hmelevskaja kerto Karjalan Sanomat -lehellä.
Il’l’a on kylän šuojelija, kylän kirikkö on nimitetty Jumalan šananšuattaja Il’l’an kunnivokši, niin jotta kylän päivyä vietetäh juuri Il’l’anpäivänä. Perintehellisešti juhla alkauki sluušpašta Jumalan šananšuattaja Il’l’an kiriköššä.
Kylän istorijallisešša ošašša lähellä Ončči-kupčan taluo vierahat ta paikalliset eläjät šuahah nähä eri luovien kollektiivien esitykšie. Pruasniekan aikana toimiu Kala ja marjapojat -kešäkahvila, järješšetäh kilpailuja lapšilla ta valokuvaušpaikka. Lisäkši on šuunniteltu kierroš runonlaulajien kylän istorijallisešša ošašša.
Juhlan erikoisvierahana on Jyškyjärven Värttinä-teatteriryhmä. Näyttelijät esitetäh karjalankielisen Jyškyjärven katrilli -spektaklin. Kaččojat, kumpaset ei ymmärretä karjalan kieltä, niise voijah helpošti šeurata juonta ta artistojen omaperäistä esityštä.
Pruasniekka alkau 30. heinäkuuta kello 12:00.