Ven’al tänäpäi on tilavusdekuadan aigu. Kymmenen päivän aloh, ligakuun 14. päivässäh, Ven’al eläjät suajah tilata eri lehtet poštan kauti huogehembal hinnal.
Periodika-julguamon lehtilöil on äijy lugijua rajan taguagi, enimite Suomes. Heimovellet puaksumbah lugietah “Omua Muadu” da “Karjalan Sanomii” PDF-versienny. Lehti tulou tiluajan sähköpoštale hedi ilmah piästyy, ei pie tilua kois sen piendäh da ainos voibi kaččuo endizii lehten noumeroi, ku pidänöy.
Enimät Suomes eläjät lugijat tilatah PDF-lehtie Periodikan ammazen abuniekan Karjalan Sivistysseuran kauti. Ligakuun allus Karjalan Sivistysseuru sežo pani rattahile dekuadan: ligakuus da kylmykuus rahvas voijah tilala lehtet vuvven 2021 hinnoil. Tilata lehti voibi KSS:n sivul, sih niškoi pidäy täyttiä lyhyt tilavuslomake. “Oma Mua” maksau vuvvekse 2021 20 euruo, “Karjalan Sanomat” – 25 euruo.
– Olis hyvä suaja meijän lugijoin joukkoh enämbi suomelastu libo Suomes eläjiä karjalastu da karjalan kielen suvaiččijua. Yhtes puoles, myö suammo uuttu tiluajua, toizes – uuttu kirjuttajua. Meijän lehtie lugijes erähät ruvetah työndämäh meile omii kirjutuksii da runoloi karjalan kielel, hyö opitah omua vägie kirjuttajes, dai heile se hyvin rodieu, sanou Oma Mua -lehten piätoimittai Ol’ga Smotrova.