Arvautukšien ta tutkimušmatankirjutukšien šarja oli luajittu viime vuotena Kielen, kirjallisuon ta istorijan tietomiehien tutkimušmatkojen aikana. Ne oli yhissetty yhteh popularitietotevokšeh ta työnnetty Karjalan tietokeškukšen kilpailuh. Venäjän Tiijon päivänä ruato ilmotettih šen voittajakši.
— Ajatuš šynty viime vuotena kešällä pietyn tutkimušmatan aikana. Myö läksimä Louhen piirih tutkimah karjalaisie ta pomorija. Matkojen aikana meilä avautu äijän löytökšie ta myö piättimä julkaissa niijen mukah yksi arvautuš joka päivä koko matan aikana nuorien tietomiehien Vkontakte-ryhmäššä, kerto Kielen, kirjallisuon ta istorijan instituutin nuorien tietomiehien neuvošton johtaja Sergei Minvalejev.
Sergei koroštau, jotta tämä on kaikkien tutkimušmatkojen ošallistujien tevoš, vain kilpailuh piti työntyä še yheltä ihmiseltä.
Louhen piirin tutkimušmatan jälkeh oli pietty tutkimušmatka Karhumäjen piirih ta Tverin alovehella. Niijen aikana šamoin oli pietty online arvautukšien peli. Lyydiläisien luokše tutkimušmatan arvautukšie oli julkaistu myöštymisen jälkeh.
— Pelien arvautukšien teemat ta tehtävät ollah erilaisie: karjalaisien ta pomorien paikannimistö, kieli, kulttuuri, kotišeutututkimuš, šanojen merkityš. Tehtävinä ollah valokuvat tahi kyšymykšet, lisäsi Sergei.
Voitošta šuatuo palkintuo nuoret tutkijat šuunnitellah käyttyä tutkimušmatan järještämisen.
Nykyjäh hyö niise pietäh Venäjän tiijon päivällä omissettuo interaktiivistä pelie. Še jatkuu tuiskukuun 15. päiväh šuaten Kielen, kirjallisuon ta istorijan instituutin nuorien tietomiehien VKontakte-šivulla. Pelin järještäjät luvatah lahja aktiivisimmalla ošallistujalla.