Ekolougien suvaiččijat Petroskois
“Karel’skii ekologičeskii operator ” (“Karjalan ekolougine operuattoru”) on avannuh jo kolme ekostansiedu Petroskoih. Ekostansieh kuuluu eriluaduzii konteineroi, kudualoih erikseh kerätäh jättehii kierrätykseh niškoi.
Nämmä konteinerat ollah erivärizet. Mustu konteineru on metallah niškoi, ruskei – plastiekkukanistroih da butilkazih niškoi, oranževoih konteinerah pannah pet-butilkoi, keldazih – st’oklubutilkoi da bankoi, vihandah da valpahansinizeh – bumuagua, sinizeh da fiolietovoih – pahvii. Mostu ekostansiedu nygöi Petroskois on kolme – Kazarmu-uuličal, 2, Nuorižoliittoprospektal, 27, Leningruadan uuličal, 13. Kai net ollah suurien laukkoin rinnal.
Sbormobil’
Petroskois makulatuurua da plastiekkua vie ottau kierrätykseh Sbormobil’, kudai ajelou linnua myöte kaksi kerdua kuus – enzimäzenny da kolmandennu pyhänpiän. Sbormobil’an reissuloin aigulistua voibi kaččuo adresil vk.com/1sbor. Sidä paiči makulatuurua, st’oklua da plastiekkua voibi andua kierrätykseh JUVI PTZ -laitokseh. Ližiä tieduo voibi suaja internetas adresil ювиптз.рф.
Ekotaksi Kalipso
Vie Petroskois on Ekotaksi, kudai ajelou Petroskoidu myöte kerran kuus. Se ottau kierrätykseh mostu plastiekkua, kuduadu ei ota Sbormobil’ (PP5 -plastiekan erähät lajit, PS6 -plastiekkua), sego st’oklua, makulatuurua, metallua. Tarkembat tiijot heijän ruavos voibi löydiä VK-sotsialiverkos.
Plastiekkubutilkat kierrätykseh!
Petroskois ollahgi statsionuarizet konteinerat plastiekkubutilkoih niškoi. Niidy Petroskois on enämbi 60 linnan eri mikropiirilöis. Net azetti Karjalan ekolougine operuattoru -firmu da sen podr’adčiekat – firmat “Aprel’” da “Ekoservis”. Konteineroin luvetteluo voibi kaččuo internetas.
Jiännökset dieloh
Petroskoin valdivonyliopiston alovehel, adresil Leninan prospektu, 29, nygöi on yhteiskunnalline komposteru jiännöksien hävittämizeh niškoi.
Komposterah voibi panna vaiku ouveššiloin da puunandimien kuorii da jiännöksii, koufein rabua, čuajuzavarkua, pitsan vakkazii.
Tetra Packua sežo otetah
Tetra Pack (Pure Pac, EloPack, Tralin Pak) on moine pakuičus, kuduah pannah maiduo, kannatestu, marjuvetty da muudugi. Niilöi Petroskois kerätäh da vietäh Piiterih kierrätykseh volont’ourat, kuduat tahtotah, ku Karjalan kuadopaikois ei olis Tetra Packua. Mostu pakuičustu otetah vastah kerran libo kaksi kerdua kuus, pyzyvästy aigulistua projektal ei ole, sidä pidäy kaččuo internetas, adresil vk.com/spasem_tetrapak_ptz.
Pidäy sanuo, ku pakuičustu enne kierrätykseh annandua, pidäy pestä, kuivata, leikata da kanzi pidäy ottua iäre.
Ku tahtonemmo eliä puhtahas da tervehes muailmas, pidäy ainos andua kierrätykseh kai, midä otetah sih.
