Šuihkulähtiet: uuši paikka perehlevolla
Šuihkulähtiet -levon ta urheilun keškuš šuunnitellah Petroskoissa. Šen piätehtävänä on ekologini šivissyš ta luonnonšuojelu šekä tervehellini elämäntapa. Niise keškuš tulou hyväkši ajanviettopaikakši aikuhisilla ta lapšilla, Petroskoin eläjillä ta vierahilla.
Lepo- ta luontokeškukšen projektie rupieu toteuttamah Onego-kauppayhtijö. Šuunnitelmissa on luontopolun kunnoštamini, GTO-normien šuorittamiskenttä, nuorapuiston ta jiäkentän rakentamini. Kaikki kohat ilmeššytäh Šuihkulähtiet-hiihtopaikan viereššä.
— Projektin piätarkotukšena on järještyä kaupunkissa paikka, kumpasen avulla jokahini vois lähemmäkši tuttavuštuo luontoh ta šuaha kiinnoššušta tevehyöštä elämäntavašta. Keškukšešša jokahini voipi šuaha urheilu- ta turismipalveluja, šelitetäh Karjalan talouškehitykšen ta tevollisuon ministerijöššä.
Projektin toteuttamisen jälkeh jo enši vuuvvekši šuunnitellah polkupyöräajot, kävelyretkijä, jooga-tuntija ta toisie aktiivisie pitoja. Keškukšen lisäkši ruvetah toimimah tietopistehet ta urheiluvaruštehien vuokruanta.
