Uhokun 14. päiväl Sovetskijan Sojuzan Gerojale Anna Lisicinale täuduiži 101 voz’. Vanhan hüvän tradicijan mödhe joga voden Kalages hänen muštoks tehtas sur’ sportpraznik — suks’voibištelend.
— Mö ülendamoiš, miše Anna Mihailovnä sündui Kalages, miše mö kaičem muštod hänes, kaik mö tedam hänen urohontegos. Tö kaik olet jo vägestajad, sikš ku ühtnet mugoižehe voibištelendaha, muštad Anna Lisicinad. Olen ihastusiš, miše tembei mijale tuliba uded sportmehed Präžaspäi, Ladvavetkaspäi, sanui tervhensanoid kaikile tulijoile Kalagen školan pämez’ Svetlana Gotič praznikan avaidusel.
Jäl’ges praznikavaidust Kalagen pämez’ ühtes školan pämehenke da openikoidenke paniba änikvencan Anna Lisicinan muštpachale, a kaik sportmehed läksiba suks’ladule.
Necil vodel suks’voibištelendaha ühtni enamba 120 sportmest Kalagespäi, Šoutjärvespäi, Šokšuspäi, Kaskezaspäi, Präžaspäi, Ladva-Vetkaspäi, Zaozerjespäi. Peniden sportmehiden täht suks’lad oli tehtud järvenno, aigvoččiden täht — mägenno. Kaikuččes igäkategorijas parahimad sportmehid saiba medalid, kaik toižed — muštlahjoid.