Karjalas jatkub ”Puškinan kart”-programm. Se andab voimust kävuda muzejoihe da teatroihe i maksta kartal. Nügüd’ lapsed da norišt voiba kävuda ei vaiše Karjalan Rahvahaline muzejaha, no mugažo sen filialoihe: Šoutjärven vepsän muzejaha, Karjalan frontan muzejaha da Istorijan muzejaha ”Morcialižed veded”-kurortal. Kaik ned vaumičeba melentartuižid ozutelusid.
― Šoutjärven muzei Rürik Loninan nimel taričeb kävujile tulda ozutelusihe, miččed voiba tundištoitta vepsän rahvahan istorijanke, kelenke da veroidenke. Mugažo muzejan radnikad starinoičeba külän polhe. Jaugmatk vepsläižedme külädme avaidab äi melentartuižid tedoid ristituiden täht, sanub Šoutjärven muzejan radnik Jevgenii Fotejev.
Miše ühtneda programmaha pidab kirjutadas ”Gosuslugi”-portalas da sada virtualižen vai plastikkartan.
Kaiken Venäman programm ”Puškinan kart” zavodihe necen voden sügüz’kus. Sen abul nored mehed, kelle om 14-22 vot voiba ostta biletad teatroihe da muzejoihe kartal i ei maksta ičeze dengoid. Vodel 2021 kartal om 3 tuhad rubl’ad.