Moskvas pagištas kodikeliden kaičendas i kehitoitandas
Moskvas heinkun 5.—7. päivil mäneb Rahvazkeskeine konferencii. Sihe ühtneba ekspertad enamba mi 50 maspäi. Vepsän rahvast ezitab Vepsän kul’tursebran pämez’ Larisa Čirkova Karjalaspäi. Konferencijal letas kaikid aktualižembid küzundoid, miččed koskeba kodikeliden kaičendad i niiden tugendad.
— Tämbei kaikiden rahvahiden keliden kaičendan problem om aktualine kaikes mirus. Om tärged meletada kaikuččele meišpäi, pagižem-ik mö kodikelel kodiš lapsidenke, opendaba-ik lapsed kodikel’t školas, midä kaikutte mez’ tegeb, miše kaita kodikel’t. Mö em vaiše pagižem kelel, sen abul mö andam rahvahan tradicijoid, veroid sugupol’vespäi toižhe, sanub Larisa Čirkova.
Rahvazkeskeine konferencii tehtas Rahvazkeskeižen igähižiden rahvahiden keliden voz’kümnen vodel. Sen pätegend om popul’arizoitta mahtišt Venämal igähižiden rahvahiden keliden kaičendas i kehitoitandas.
— Olen korktad mel’t ühteta konferencijaha, nece om hüvä voimuz vajehtadas mahtištol kollegoidenke, el’geta, mitte tämbei om situacii kelidenke kaikes mirus i midä meile voib tehta sen täht, miše kaita meiden vähäluguižen rahvahan kel’t — vepsän kel’t, ližazi Larisa Čirkova.
