Moskvan eläjad da adivod tundištasoiš vepsän kelenke

Mastar’-klassoil ozutelusen kävujad saba tedoid vepsän kelen erigoičusiš da opendaba erasid kebnoid sanundoid vepsäks. 0+ Kuva: Karjalan rahvahaližen da regionaližen politikan ministerstvan VKontakte-gruppaspäi

Necil nedalil “Periodika” ezitab ičtaze “Venäma”-ozutelusel Moskvas. Toižiden azjtegoiden keskes ozutelusen kävujad voiba tundištadas vepsän kelen erigoičusidenke.

Tundištoitmaha ozutelusen adivoid vepsän kelenke tuli Moskvaha Petroskoin universitetan 4.-voz’kursan üläopenik Jekaterina Martinkova. Hän vedäb ozutelusel kelen mastar’-klassoid, a zavodib niid starinaspäi vepsläižiš. 

— Ezitada Karjalad necil ozutelusel om sur’ arvostuz minun täht. Surel tahtol hökkähtuin ühtneda sihe. Meiden čomad bukletad kingitaba ozutelusen kävujiden homaičust. Hö melentartusenke küzeleba mindai vepsläižiš. Mastar’-klassoil ristitud saba tedoid vepsän kelen erigoičusiš da opendaba erasid kebnoid sanundoid vepsäks, starinoiči Jekaterina. 

Kahtes päiväs oli jo vedetud kümne mugošt mastar’-klassad, miččihe ühtni enamba 30 mest. Mastar’-klassoiden ühtnikad tuliba Velikie Luki-, Habarovsk-, Piter-, Volgograd, Pskov-, Moskva-, Nižnii Novgorod -lidnoišpäi.