Lapsiden mezeikeskuses, mitte radab Kiži-muzejan pohjal, vedetas melentartuine programm ezmäižen klassan openikoiden täht. Programman nimi om ”Urok vanhas školas”. Urokan aigan lapsed putuba vanhaze aigaha i tegesoiš XIX voz’sadan openikoikš. Lapsed saba äi uzid melentartuižid tedoid, ozutesikš, kut nimitadihe mugomid školid, ken sigä openzihe i ken oli opendajan, äjak openikoid oli klassas, kut mäniba urokad, miččed urokad oliba, mišpäi tehtihe černiloid i eskai hö iče voiba probuida kirjutada endevanhoiš kirjamozutusiš todesižel suugkirjutimel.
— Nece programm radab pakičusiden mödhe vilukun lophusai. Sobat om kanzan päiv, tuleba lapsed ičeze vanhembidenke, a muupäivil meidennoks tuleba openikoiden gruppad, kogonaižed klassad, sanub Lapsiden muzeikeskusen radnik Anna Isakova.
Jäl’ges programmad lapsid varastab interaktivine ozuteluz ”Земля KižiMua”. Neciš čudokahas mas lapsed voiba tehta erazvuiččid tegendoid, pajatada pajoid, kundelta londusen änid, tundištadas vanhoidenke pertin kaluidenke.