Karjalan nuorison EtnoPRO-issunto jatkuu Petroskoissa
31 nuorta ihmistä Karjalan eri piirilöistä, viisi opaštajua ta kolme luventojen lukijua nellän päivän aikana ečitäh ta ajatellah uušie ta tehokkahie keinoja, mitein eistyä Karjalan kantakanšojen kielie ta kulttuurija. Tänäpiänä issunto oli virallisešti avattu, ka vielä eklein jäšenet käytih Kantele-talošša interaktiivisešša ohjelmašša ta tuttavuššuttih “Periodikan” toimintah.
Tämä issunto on järješšetty enšimmäistä kertua, alkuhpanijana on Karjalan kanšallisen ta alovehellisen politiikan ministerijö.
– Tapahtuman pitämisen kyšymyš šynty jo ammuin. Myö tarvičemma uušie innokkahie ihmisie piirilöissä, jotta hyö kehitettäis kieltä ta kulttuurie paikoillah. Petroskoissa hyö vaštauvutah Periodika-kuštantamošša, kumpani tuli šuurekši mediakeškukšekši ta yhistäy Karjalan kanšojen kulttuurie ta kielie kehittäjie ta šäilyttäjie laitokšie ta kumpani voi tarita hyvie opaššušmahollisukšie, šano Karjalan tašavallan kanšallisen ta alovehellisen politiikan ministeri Sergei Kisel’ov.
Tänäpiänä nuorisoissunnon jäšenet alettih ruatuo omissa ošaštoissa ta tutuššuttih Karjalan taitomusejon LiguaMuseo-projektih. Opaššušohjelma jatkuu myöhäh iltah ta koko issunto loppuu piätinččänä, konša nuoret lähetäh Kintahan kyläh.
Aihiešta voit lukie niise šuomekši.
