Karjalaini kruuka anto alun šuurella pruasniekalla
Karel’skii okatiš -rautamalmirikaštamon 40-vuotisjuhlalla šekä Metallurgin päivällä omissettu pruasniekkaohjelma starttasi Koštamukšešša 5. heinäkuuta. Juhla avattih kaupunkin kanšalaisjärještöjen jäšenet ta Družba-kulttuuritalon luovien kollektiivien artistat.
— Koštamukšen piäaukivolla karjalaiset, ukrainalaiset, azerbaidžanilaiset, tatari-baškiirilaiset ta jevreit näytettih omie värikkähie kanšanpukuja, laulettih lauluja muamonkielillä ta tanššittih rahvahantanššija, kerrottih juhlan järještäjät.
Koštamukšen karjalaisie esitettih Viena-šeuran ta Hete-folklorikollektiivin jäšenet.
Artistat laulettih lauluja Kalevalan kantelistiyhtyvehen šoitolla. Kantelen taikamusiikki ilahutti keräytynyitä taivahan alla.
Konsertti loppu šuurella perintehellisellä karjalaisella kruukalla. Šen vetäjänä oli Hete-folklorikollektiivin artista Svetlana Kannojeva.
