Enzimäzii eläjii, lypsylehmii, jo tuodih ferman uvvistettuloih tiloih, kus hyö harjavutah olemah uuzis ololois. Fermu ei ole ihan uuzi. Se on kunnostettu vahnu. Nygöi fermal kai on toizin, se on kogonah muutettu nygyaijan tarbehien mugah. Sie lehmät sydämes ollah välläl, niilöi ei pietä soimes kiini. Ferman lähäl on nostettu uuzi lypsändykompleksu, kus ollah lämmät lattiet. Uuzien laittehien keskes on mostugi, kuduat maltetah kaččuo joga žiivatan tervehytty. Ruado-olotgi, tiettäväine, muututtih parembah puoleh.
Tänä keviän Videles ymbäri kačotah kyndiä da kylviä kaksisadua gektuarua peldomuadu. Tulien vuon Videles kohendetun ferman rinnal kačotah nostua vie yksi uuzi, sen vuoh suurendua karju kahteh kerdah.
— Jo lähi kuuloil Videles ruvetah lypsämäh kaheksatostu tuhattu litrua maiduo päiväs, sanoi Alavozen souhozan johtai Jurii Burtsev Karjalan piämiehen lehtistöpalvelule.
Kyndömualois Videles ei ole hädiä. Mustoitammo, gu vuvvennu 2023 fermal piettih kohendus- da kunnostusruavot. Niilöih meni enämbi kahtusadua kahtukymmendy miljounua rubl'ua, kudamis sada kaksikymmen kaheksa miljounua — abujen’gat Karjalan b'udžietaspäi.