Petroskoiš mäni Rufin kirjan prezentacii. Vepsäks sen kändi filologijan tedodoktor Nina Zaiceva, pirdi kuvid Petroskoin školan № 43 openik Valeria Sotnikova.
Rufin kir’ paindihe Suomen Biblijan kändmižen institutan abul i anttihe lahjaks vepsän rahvahale. Kirj om pen’, no lujas čoma i melentartuine. Vepsäks sen kändi Nina Zaiceva, toimitandradod tegi Ol’ga Žukova. Valerian Sotnikovan pirdatusiden abul üks’ Biblijan palaspäi tegihe lähemba vepsläižile. Kuvil om vepsän rahvahanke sidotud tem, om ozutadud rahvahaline sädo da vepsläižile läheline kul’tur.
— Nece kirj om kätud äjihe suomalaiž-ugrilaižihe kelihe i kaikid niid kuvitiba lapsed. Nece kirj läheneb meid Jumalaha i kehitoitab vepsän kel’t. Mugoižiden kirjoiden abul mö tedištam midä-se ut ičemoi kelel. Kirjas oma vepsläižed motivad, läheline meile kul’tur, sikš se avaidase toižile lapsiden sil’miden kal’t, lapsiden kuviden kal’t, i lapsile se linneb mugažo melentartušt, sanub Nina Zaiceva.
Kirj starinoičeb noren Ruf’-neiččen istorijan polhe. Sigä om ozutadud lämäd sidod ristituiden keskes kanzas, kesknäine abu da el’genduz.
Prezentacijan aigan oli ozutadud fil’m-ki vepsän kelel Rufin polhe, sen äneti Larisa Čirkova. Kacta sidä voib täs.
Uzištoid neciš temas voib lugeda mugažo suomeks.