Rahvahaline muzei kucub kävelta tal’vmecadme
Uz’ ”Tal’vmec”-ozuteluz om Rahvahaližes muzejas. Se zavodihe 24.kül’mkud. Ozutelusel nered muzejan kävujad voiba tedištada, kut živatad vaumičesoiš tal’veks. Ken živatoišpäi magadab tal’vel, a ken ei magada. Mugažo adivod voiba nägištada mecživatoiden kodid, a tal’vsömsija starinoičeb, midä meceläjad navediba söda.
Ozutelusen pätähthan tegihe Kondjaine, mitte tuli Rahvahaližen muzejan fondaha jo 150 vot tagaze. ”Tal’vmec”-ozuteluzsijan hended oma erazvuiččed živatad: kondi, orav, pohjoižreboi, mägr da lindud, miččed tal’vduba Karjalas.
― Mö meletam, miše nece uz’ ozuteluzsija linneb mel’he lapsile päivkodišpäi. Školiden openikoile da kaikile, kelle om melentartušt tedištada Karjalan živatoiden mir tal’vel, sanub Petroskoin Rahvahaližen mezujan radnik, ozutelusen ohjandai Maija Babakova.
Muzejan adivod ei vaiše saba äi melentartuižid tedoid živatoiden polhe, mugažo hö voiba väta: sötta živatoid, löuta linduid da živatoid jäl’gen mödhe. Ozuteluz radab sulakuhusai.
