Venäman pälidnas, Moskvas, mäneb tradicionaline ”Pohjoižen kal’hudet”-ozuteluz-jarmark. Neche tärktaha azjtegoho ühtneba käziradoiden mastarid, taidehpirdajad, karg- da pajokollektivad, mugažo kundaližiden sebroiden da valdmehišton ezitajad. Ozutelusen aigan oli tehtud paginvastusid, miččihe ühtniba”Vepsän kul’tursebran ühtnikad.
— Paginvastusel, mitte oli omištadud igähižiden rahvahiden keliden opendamižehe, Šokšun školan pämez’ Nina Koren’kova jagoihe mahtištol audiokirjoiden, videorolikoiden da -urokoiden tegemižes. Toine tärged tem oli etnologižes ekspertizas. Natalja Silakova ičeze dokladas koski mugoižid tärktoid küzundoid, kut ekologii, vepsläižiden tradicionaližen elotahon kehitoituz, tegeližiden radištoiden da sijaližiden eläjiden kožumine, starinoiči ”Pohjoižen kal’hudet”-ozutelusen ühtnik Irina Sotnikova.
Ozutelusen adivoid voiba tundištadas Pihjoižen igähižiden rahvahiden unikaliženke kul’turanke, tradicijoidenke da istorijanke, ühteta käziradoiden mastar’-klassoihe.
— Necil vodel ezmäižen kerdan radoi kul’turprogramm lapsiden täht ”Arktikan lapsed”. Mö starinoičim lapsile vepsän rahvahan polhe, keles, tradicijoiš. Openzim heid pagižmaha tervhensanoid i ühtes panim tätüižen päle vepsän rahvahan sädod. Meletan, nece om hüvä idei, ved’ lapsil täs om voimuz tundištadas Arktikan rahvahiden kul’turanke vändformas, ližazi Irina Sotnikova.
”Pohjoižen kal’hudet”-ozuteluz-jarmarkan tegii om Venäman Pohjoižen, Sibirin i Edahaižen Päivnouzman igähižiden vähäluguižiden rahvahiden associacii.