Muzejiden ö: Šoutjärven muzei varastab adivoid
Joga voden Šoutjärven etnografine muzei ühtneb kaikenvenäman ”Muzejiden ö”-akcijaha. Nece azjtego Šoutjärves tuli jo čomaks tradicijaks i külän praznikaks, mittušt lujas varastaba lapsed i aigvoččed. Muzejan radnikad kucuba adivoid semendkun 14. päiväl nelläs časuspäi päiväd kümnehe časuhusai ehtad.
— Nece praznik tehtas kaikiden ristituiden täht, ken tahtoib tulda muzejaha. Ihastoitab se, miše kaikuččel vodel tuleb kaik enamba sijališt rahvast vepsläižiš külišpäi. Ved’ muzei om tehtud ezmäi kaiked vepsläižiden täht, miše kaita vepsän kul’turad i antta sidä polvespäi polvehe, sanub muzejan radnik Jevgenii Fotejev.
Programmaha mülüba Rürik Loninale da Aleksandr Maksimovale omištadud ozutelused, mastar’-klassad da vastused mastaridenke, vändod aitanno, kvestad aigvoččiden täht i äi tošt. Šoutjärven eläi, ecindjoukun ohjandai Viktor Lonin starinoičeb adivoile voinan polhe.
Praznik lopiše čomal koncertal, miččel ezitaškandeba Vepsän rahvahan hor da lapsiden ansambl’, mittušt ohjandab Jelena Larina.
