Karjalas mäneb karjalan da vepsän paginan marafon
Karjalan eläjad voiba tehta ičeze panendan vepsän da karjalan keliden kaičendaha ”Kundlen kodipaginad”-marafonan aigan.
Materialad keratas necen voden 23. vilukuspäi 1. kezakuhusai Karjalas, Piterin, Vologdan, Tverin da Murmanskan agjoiš.
— Mugoine projekt meil tehtas ezmäižen kerdan. Tahtoižim sada paginoiden ozutesid kelen tundijoil. Om tärged paginan tem-ki. Pagižii voib starinoita melentartuižen istorijan ičeze elospäi vai, ozutesikš, sarnan, sanub Karjalan Kelen, literaturan da istorijan institutan tedomez’ Irina Novak.
Marafonan ühtnikoile pidab änetada karjalan vai vepsän kelen paginan ozutez vai oigeta se ičeze arhivaspäi.
Projektan aigan kelen oppijad arvostaba karjalan da vepsän paginoid da tegeba ičeze ühthevedoid — tarkišteleba, miččed vajehtusid tegihe neniš keliš aigan sirttes.
Marafonan vägestajid nimitadas necen voden 7. redukud. Parahimad änetused pandas Vepsän da karjalan keliden korpusaha, mitte om avoin kaikile.
Sada enamba tedoid marafonas voib VKontakte gruppas.
Vepsän da karjalan keliden korpusas om vajehnikoid, Karjalan rahvahiden suomalaiž-ugrilaižiden keliden korpusoid. Vepsän da karjalan keliden korpus avaitihe 24. kezakud vodel 2016. Nugüd’ neciš korpusas om 65 293 kirjutest sanoiš, 4 426 tekstad 46 kelel da niiden paginoil.
”Kundlen kodipaginad”-marafon tehtas Karjalan Kelen, literaturan da istorijan institutan, Petroskoin universitetan, Karjalan valdkundan karjalaižiden IX suiman valdakahiden mehiden nevondišton abul. Regionoidenkeskeine marafon pidetas tedomehiden Matvei Mihailovič Hämäläižen da Grigorii Nikolajevič Makarovan muštoks.
Necidä uzištod voib lugeda mugažo karjalan, venän da suomen kelil.
