Egläi Šoutjärv’ vastsi adivoid Petroskoišpäi: Karjalan Taidehmuzejan radnikad zavodiba “Joksmust vaste. Pohjoižvepsläižed” -projektan, mitte om oigetud päazjan koumehe Änižröunan vepsläižehe küläha — Šoutjärvehe, Kalagehe da Šokšuhu.
— Mö ühtes Venäman taidehpirdajiden sebran pämehenke Vladimir Zorinanke starinoičim školan openikoile projektas, ozutim Karjalan Taidehmuzejan virtualižen ozutelusen Pohjoižen londuses da tedotim pirdatusiden konkursas “Tulijan aigan veneh” -temale, starinoiči projektan ohjandai Julia Aprodu.
Lapsiden pirdatused abutaba Vladimir Zorinale säta Šoutjärves art-objektad — vepsän kul’turan kaičendan simvolad. Mugažo Šoutjärven vepsläižen etnografižen muzejan pämez’ Natalja Anhimova starinoiči vastusel külän nimen istorijas. Ved’, ühten versijan mödhe, Šoutjärv’-nimi-ki om sidotud venehe.
Projekt jatkub seičeme kud. Sen aigan tehtas äi erazvuiččid azjtegoid, miččed om oigetud vepsän kul’turan popul’arizoitandaha. Nene oma art-ekspedicijad vepsän male, sijaližiden eläjiden tundištoituz Karjalan taidehpirdajidenke, kuvaozutelused da mastar’-klassad.