Karielan tie -labirintti on avattu
Karielan tie -labirinttileikin ošanottajat ruvetah tuttavuštumah kaikkie halukkahie tverinkarjalaisien istorijah, kulttuurih ta kieleh. Ammatilliset rakentajat, paikalliset eläjät ta volont’orit ošallissuttih labirintin rakentamiseh. Projektin kekšijänä on Marina Jevgrafova ta arhitektoriloina oltih Ivan Zver’kov ta Sofja Kuhtova.
— Labirintin avajaisissa myö pyörimä piirileikissä ta šoittima musiikkie šekä kuulima äijän kiitoššanoja ta šaima lahjoja. Šamoin meilä oli esillä näyttely, mi valmissettih KADR 26 -arhitektuurin, disainin ta restauroinnin opiston opaštujat. Hyö kerättih etnografista materialie Tverin Karjalašša ta luajittih 18 šuurta šeinätauluo šuatujen tietojen mukah, kerto projektin johtaja Marina Jevgrafova.
Labirintin järještäjien šuunnitelmissa on iellähki kehittyä šeikkailupelie, kuččuo vierahie, kunnoštua Čaškovon karjalaini talo -paikkua.
— Nyt myö kekšimä šeikkaulupelie, šiinä on nellä teemua: istorija, pruasniekkojen perintehet, karjalan kieli ta Kalevala-eepossa. Labirintissa on nellä piäšyö ta nellä ošua. Jokahisešša ošašša ošanottajien pitäy vaššata eri teemojen kyšymykših, lisäsi Marina.
Labirintti on korissettu perintehellisillä kuvilla ta veššokšilla. Še rakennettih Kulttuurijälki-projektin rajoissa, kumpani šai Presidenttišiätijön grantin.
