Kakši uutta merkkie ašetettih Jyškyjärveššä
Uuvvet art-kohtehet Jyškyjärven kylyä varoin luati puušeppä Vladimir Lukin. Muasteri luati tämmösie simvoli-merkkijä jo viijettä kylyä varoin. Veššokšešša on kuvattu Kalevalan muan Venetsijan – Jyškyjärven kylän simvolija.
— Käpy on joka kalaštajalla, aina vet karjalaisien piti verkkoja paikata. Veneh niise on Jyškyjärven merkki, šentäh kun ympäri on vettä. Uittoruatajat on kylän istorijan tärkie oša, Čirkka-Kemie myöten vet uitettih meččyä. A joučen on esitetty, šentäh kun Jyškyjärven lähellä on Perälampi, kumpasella kevyän ta šykyšyn paikanmuuton aikana on jouččenie. Šamoin merkissä on časoun’an ta talon kuvie, kertou muasteri Vladimir Lukin.
Veššoš ylen miellyttäy jyškyjärviläisie, še kaunistau kylyä. Tevoš luajittih Kalevalan piirin etnokulttuurikehitykšen projektin rajoissa. Jyškyjärven kylähallinto autto šen ašettamisešša.
Nyt muasterilla on uuši ajatuš – luatie Kalevalašša neiččyön veššokšen ta issututtua še šatula-nimesellä kivellä, mi on Kuittijärveššä Kalevalan Likopiä-ošašša. Konša vettä on vähän, ni kivi näkyy, a kun vejen tašo noušou, kivi on vejen alla. Tytön veššoš rupieu muissuttamah kiven legendašta, kun kalaštaja jätti pahavirkasen akan tällä kivellä ta iče läksi yksin kalaštamah. Nyt veštäjä eččiy innoštajua hahmuo tevošta varoin.
