Petroskoin da Sankt-Peterburgan tiedomiehien yhtehine karjalankoivun tutkimizen projektu on andanuh suuren tuloksen.
Projektan hantuzis on löytty, kudamas kohtas vizakoivun hromosomois on se genomu, kudaman periä puul on čoma pindurakendeh.
— Jo sada vuottu tiedomiehet ečittih vastavustu sih, min periä vai erähät karjalankoivun puut kazvetah tovellizikse vizakoivuloikse. Syynny piettih muaperän luaduu, suurii pakkazii da kaikkie muudu, mi vaikuttau puun kazvamizeh da čomevuoh, kirjuttau Karjalan Tiedokeskuksen saittu.
Enne se nägyi vaste 8-15 vuvven peräs, konzu puu kazvoi suurekse. Nygöi jo ylen aijoi voibi tiijustua, roihgo puu vizakoivukse. Kahten vuvven aigua oli tutkittu 192 puudu. Projektan ruadoh yhtyi Karjalan tiedokeskuksen Meččyinstituutan vanhin tiedoruadai Lidija Vetčinnikova, kudai jo 50 vuottu tutkiu vizakoivuu. Nygyaigaizien laittehien da tutkimustavoin avul Betula pendula Roth var.carelica nygöi voibi pidiä iččenäzenny puuluavunnu, ottua se vardoiččemistu tarviččijoin puuloin kirjoil da piästiä tämä harvu da kallis puu häviämizes.
Suuren tiijollizen merkičyksen ližäkse tämä tiedomiehien löydö pienendäy menetyksii da andau suurdu hyödyy vizakoivun tevolližuskazvattamizes.
Projektan tutkimuksien tulokset on painettu kanzoinvälizes tiedožurnualas Scientific Reports.